خبرني - في قصة تلخّص معنى الإصرار والعمل الشريف، يروي شاب من منطقة المنارة في العاصمة الأردنية عمّان رحلته من جمع الخردة في الشوارع إلى الحصول على درجة الدكتوراه، مؤكدًا أن الطموح قادر على تغيير المصير مهما كانت الظروف.
وتاليا ما كتب الدكتور أحمد :
من جمع الخردة إلى الدكتوراه "اسمي أحمد طلال العبد، عمري ٣٥ عاما من منطقة المنارة – عمّان "
في الحارة بينادوني الدكتور أحمد تبع الخردة، واللقب هذا بالنسبة إلي صار وسام فخر مش مجرد اسم
كنت طالب صف تاسع، والظروف المعيشية كانت صعبة، فبدأت أشتغل بجمع الخردة في الحي حتى أقدر أساعد حالي وأهلي
ومع الوقت صرت معروف بالحارة، ينادوني بالمناسبات حتى أجمع علب الكولا الفاضية
بس للأسف، مع الشغل بطّلت أركّز على الدراسة، وصرت أروح المدرسة بس للحضور… لحد ما رسبت بالتوجيهي بكل المواد
لكن ما استسلمت
كبرت مشروعي وصار عندي "بِكَم" ومستودع، وبعد فترة صاروا ٣ بكمات ومستودع أكبر لجمع الخردة
بعمر الـ24، قررت قرار غيّر حياتي…
رجعت أقدّم التوجيهي من جديد، درست وتعبت على حالي، ونجحت بمعدل 78
ومن هون تولّد عندي طموح ما توقّف
قدّمت على الجامعات، وانقبلت في جامعة مؤتة، ودرست تخصص الجغرافيا، وأنهيت البكالوريوس بعمر الـ28
وكنت بعد الدوام الجامعي أرجع أشتغل بجمع الخردة
بس طموحي ما وقف هون، كملت ماجستير، وبعدها دكتوراه، والحمد لله اليوم أنا رسميًا الدكتور أحمد تبع الخردة
ما زلت أعمل في نفس مهنتي اللي بدأت منها، لكنها اليوم صارت رمز للتحدي والكرامة والعمل الشريف
أكتب هذه الكلمات لعلها توصل رسالة:
العمل مش عيب، العيب إنك توقف مكانك وتستسلم
العمل عبادة، والعمل طريق الراحة والنجاح
وما زلت مؤمن أن:
عملك هو فخرك، وثمرة تعبك هي عنوانك الحقيقي"
