قصة ابو أحمد !

ابو احمد.. رجل يعشق تصفح المواقع الالكترونية ويدمن حد الجنون التعليق على خبر من هنا وخبر من هناك، مستخدما كل مرة اسما جديدا لتعليقاته الصاروخية ! ابو احمد المتحمس كعادته، يفتح احد المواقع الالكترونية، فاذا بخبر عن "خالد شاهين" باعلى الصفحة.. يقرأ عنوان الخبر فقط.. فالرجل لا يحب الدخول في التفاصيل من منطلق ان المكتوب يقرأ من عنوانه ! استل ابا احمد اصابعه .. وارسل اول تعليق على الخبر واليكم المشهد كما حدث بالضبط : "سحر" : شو هالمصيبة ناقصنا شاهين وغيرو بهالبلد (طبعاً ابو احمد هو نفسه سحر) ! "شادي": (طبعا شادي هو كمان ابو احمد !): ليش زعلانة يا سحر ؟ هاي ديمقراطية خلي كل واحد يعبر عن رأيو ؟ "ابو جابر": كمان هو..ابو احمد: شو مالك عليها يا زلمة خلي المزة تحكي الي بدها اياه .. تسلميلي ! "سعيد": (صاحبنا): والله انا تعس واحد بهالدنيا ! "صقر ام قيس"(اخونا ابو احمد ما غيرو): ليش يا زلمة .. ما انته اسمك سعيد !! يارا الامورة : (ابو احمد باسم دلع): سيبونا من شاهين ومن قصصو .. حدة حاب يتعرف ! انا امورة وحلوة ونغشة ومتل القمر !! .. هنا عشرات ومئات التعليقات التي بدأت ترد على يارا الامورة من معلقين اخرين (غير ابو احمد) وكلهم ابدو استعدادهم للتعرف عليها..! فيما بدأ دم صاحبنا ابو احمد يغلي لتاخر نشر ردوده نظرا لكثرة التعليقات التي انهالت على طلب الامورة ! ابو احمد ولعت معو ..يكتب.. ابو احمد: (اسمه الحقيقي): هلا هذا الشاغل بالكو بس يا شباب؟ يارا ومارا.. اتفووووووو عليكو .. بدل ما تكون اهتماماتكم باشياء مفيدة ..دايرين وره البنات بس !! نغوش: (شاب يرد على ابو احمد):يا عم ابو احمد ما تلومنا.. هاي البنت شفت صورتها ع الفيس بوك ..شقفة! والله لو تشوفها لتعذرنا ! ابو احمد: مين هي؟؟ نغوش: يارا الامورة يا زلمة ! ابو احمد (نسي انه هو الذي كتب التعليق باسم يارا)! كتب مخاطبا نغوش: بشرفك بتحكي جد يا زلمة ؟؟ نغوش: زي ما بحكيلك يا عم ابو احمد .. البنت مزّة م الاخر..لو تشوفها ليخف ضبان عقلك ! ابو احمد (الناسي) ركبت برأسه القصة ! وعلى الفور كتب مداخلة: فارس الاحلام: (اكيد هذا الاسم الجديد للعم ابو احمد!) :الى يارا .. انا شاب ..وسيم .. ثري .."اعزب" ! وعندي عمارتين وشقة و3 سيارات .. ابحث عن شريكة .. اذا حابة تتعرفي ابعثيلي رد !؟ عشرات التعليقات ادرجها محرر الموقع لاحقا ولم يكن بها ردا من الامورة يارا على طلب ابو احمد(الناسي) كلها عن شاهين.. شاهين.. شاهين !!! ابو احمد مغتاظاً يكتب.. فارس الاحلام: الى المحرر .. يا اخي ليش ما بتنزل كل التعليقات والا بس الي بتعجبك ؟ المحرر: اخي فارس الاحلام.. كل التعليقات الواردة لنا تأكد اننا ننشرها تباعا ..واعذرنا للتاخير فانت ترى حجم الردود على خبر شاهين ! ابو احمد: يكتب باسمه الحقيقي: يا اخي يا محرر هله احنا خلصت كل مشاكلنا ومظلش عنا غير مشكلة شاهين..يا اخي الله يرحمو الزلمة صرلو ميت اكثر من سنتين ..خلص ! المحرر: شاهين لم يمت عزيزي القارىء .. واخر خبر يؤكد انه موجود الان بالمانيا حيث يعالج هناك !! ابو احمد: بقلك يا زلمة شاهين والله مات .. اخر فلم حضرتلو اياه بسينما رغدان .. اسمو(المصير) بطولة نور الشريف .. شو بتحكي يا زلمة ! المحرر: عن أي شاهين بتحكي ؟ ابو احمد: عن المخرج المصري يوسف شاهين ! المحرر: عزيزي القاريء يبدو انك لم تقرأ الخبر جيدا.. فهو يتحدث عن خالد شاهين ..رجل اعمال اردني ومحكوم بقضايا فساد ! ابو احمد: هااااااااا ! المحرر: والله ! ابو احمد: طيب ..سيبنا عمو! بشرفك اذا بيجيلك تعليق من صبية اسمها يارا الامورة رد على شب اسمو امير الاحلام .. بشرفك تنزلو ع السريع لو سمحت ! اوكي عمري !!!